قصيدتي ( ماكان حالك ) غناء الفنانة عافية حسن

خانجى كتب:[ندعوك للتسجيل في المنتدى أو التعريف بنفسك لمعاينة هذا الرابط]

انت الروعة بحالة لك منى خالص التحاية

د. محمد طه منصور كتب:

اخوتي الاعزاء صباح الخير

سوف انزل لكم كل اسبوع قصيدتين من ديواني ( حاجة فيك ) وذلك حتى اعطي الفرصة للجميع للاطلاع وارحب بكل نقد بناء وهادف وارجو ان اكون خفيفا عليكم ولكم عاطر الود والتحايا .. هذه هي قصيدتي الثانية والتي يقوم بتلحينها حاليا الموسيقار الفاتح حسين وستقوم بادائها الفنانة المبدعة العافية حسن وبالطبع فقد كتبت لكم القصيدة كاملة ولكن النص الذي سيتم تلحينه واداءه حذفت منه بعض الابيات ذات الطابع المتشابه حتي لاتكون القصيدة طويلة ومملة ... ارجوا صادقا ان تنال قصيدتي اعجابكم ولكم عاطر التحايا

ماكان حالك

غناء الفنانة عافية حسن
1

ياسيد الناس .. ماكان حالك
ليه اتغيرته علي مالك
ماكنت زمان تسال عني
ايه الغير زمنك وحالك
بقيت قاسي وقاسي وصالك
ليه حارمنى افكر فيك
او حتى افكر فى سؤالك
ايه النساك ريدك مالك
وايه الشاغلك وشاغل بالك
ليه اتبدلته عليا كتير
وانا كنت زمان شاغل افكارك
خليتنى اريدك من جواي
من بين الناس قلبى اختارك
ادمنتو هواك حتى عيونك
وعشقته صدودك ودلالك
اديتك روحى وهبتها ليك
اصبحته ادور بس فى مجالك
خليت الناس ليك شان ارضيك
بى اجمل روح انا عايشالك
انا ديمة معاك وانته مسافر
حافظاك فى حلك وترحالك
حافظت عليك وعلى حبك
وسهرت الليل ارعى خيالك
جافيت النوم وجفانى كمان
مشغولة عليك ايه الجالك
الناس تتكلم عن غيبتك
وانا قلبى يدافع ويرتالك
مابتحمل فيك لو كلمة
لو جات سيرتك وجات احوالك
تلقانى معاك دون مااشعر
اتكلم عن اسباب غيبتك
وافسر ليك ماجيت مالك
وانا فى جواي مامقتنعة
كاتلنى بعادك ودلالك
رامينى هواك وبفتش ليك
خلصت معاك كل اعذارك
والليلة بعد صبر السنوات
نتقابل يوم
والقاك متغيره احوالك

2

ابدا والله ده ماانته
عارفاهو هواك وعارفه وصالك
الريد احساس مابيندسه
ولو كان دسيتو فضح حالك
ومابينفع فيهو كلام معسول
من وحى اوهامك وخيالك
ليه اتغيرته على مالك؟
انا صابره عليك وعلى بعادك
اوفيت بى وعدك وعايشالك
شايلاهو غرامك فى عيونى
اخلصت معاك رغم دلالك
حافظاها عهودك رغم جفاك
حافظاك جواي وبتمنالك
ترجعلى حنين وتلقانى
من بين الناس فى استقبالك
رايداك والله انا رغم الفيك
وصدقنى كمان مشتاقالك



د . محمد طه منصور
1/12/2008م
المملكة المتحدة – بيرمنجهام