قصيدتي ( اغنية للوطن )

1

اغنية للوطن ( مهداة للفنان عبد الرحيم البركل)

بحبك وبرضو مشتاق ليك

رغم مزلة الغربة

ورغم ظروفك الصعبة

بحبك انته رغم الفيك

رغم قساوة الايام

بقيت ياوطني حاجة تمام

بقيت صامد بقيت كاسر

رضيت بي قسوة الواقع

بكل اصرار

تجسد حلمك الرائع

عشان ياوطني بكرة تقوم

يجيك حلمك

يفوت ظلمك

وتبقى تحقق الاحلام

رجالك ياوطن نحنا

برغم الظلم والمحنة

حلفنا يمين نجيب التار

ومن اجلك نخوض النار

سايرين ليك صباح ونهار

يمين والله ماارتحنا

عشانك ياوطن حالفين

نكافح ليك نرد الدين

نشيل همك

نرد ظلمك

نجيب تارك

2

نجيب دمك

نقاسي مرارة الايام

وانتا معانا مايهمك

****************

شبابك نحنا ياغالي

سواعد تبني في خصرك

رجالك نحنا ياوطني

يمين نفديك نصون جسرك

بناتك نحنا ثوب عزك

لما نقيف ندافع ليك

مافي شرارة بتهزك

وقت الحارة تلقانا

معا اخوانا في الميدان

نصون ارضك

نصون طولك

نصون عرضك

ونبذل كل غالي نفيس

نصون عرضك

*************

حماتك ياوطن نحنا

يمين والله ليك حالفين

نرفع عنك المحنة

نشيك رايتك

نصل غايتك

لابنخاف من الظلمة

ولا الاشواك بتجرحنا

3

يرفرف علمك الخفاق

يبرهن ليك ثبات امة

تتحدي الظلام والليل

تدافع عن شرف وطنا

في جوايهو بجري النيل

نحقق حلم اجدادنا

من ترهاقا لاسماعيل

نعزك ياوطن نحميك

ومابنترك متر واحد

يمين نحميها مليون ميل

******************

شبابك ياوطن نحنا

شباب الثورة والبركان

جنودك نحنا في المحنة

نفخر بيك في كل مكان

نشيل رسمك

نشيل اسمك

عاشت عزة السودان

كلمة تمجد الاوطان

تماسينا وتصابحنا

*************

ارادتك ياوطن حره

كرامتك يابلد دره

وطعمك مافي زيو طعم

لابنحسو في غيرك

ولا بنضوقو بالمره

4

لونك انت اجمل لون

سمار والله نفخربو

ونتحدابو كل الكون

يمين هاماتنا مرفوعة

ويمين كلمتنا مسموعة

ويوم نتلاقي في الفربة

كونك انت سوداني

تكون الكلفة مرفوعة

شرفك ياوطن شرفي

واسمك هو عنواني

وكرامتك هي اجمل شى

عايش جوه وجداني

وعزة نفسك الحرة

اكيد مزوعة في نفسي

قيم موجودة في كياني

وقدر مازمني يقسي علي

يزيد من همي واحزاني

ابدا ماببيعك يوم

ابدل بيك وطن تاني

وماعارف كنت كيف اعمل

لو ماكنت لي وطني

ولو ماكنت سوداني

د . محمد طه منصور