قصيدتي ( حاجة فيك)

[size=12]1

حاجة فيك

مرحب تعال نحكى سوا

نفتح سنين المستحيل

كل الكلام الكان قبيل

ندخل صبابات الهوى

اجعلنى حبك او صديق

سير قربى فى وسط الطريق

انا اصلو مابتفرق معاي

كل الدروب عندي سوا

وكل المعانى اتغيرت فى دنيتى

واصبحت مابقدر افرق

اصبح حبيبك او صديق

الطعم واحد فى النهاية

ومهما تعددت الدروب

يجمعنا فى الآخر حلم

يجمعنا فى الآخر طعم

اسمو الالم والمستحيل

مرحب تعال نحكى سوا

ونعرف الريد والهوى

كيف انت تصبح لى صديق

وانا قلبى بالشوق اكتوى

مرحب تعال وتعال وشوف

كيف انت تلعب بالحروف

مرات حبيبى خلاص تعال

ومرات تقول حسب الظروف

وانا برضو مابتفرق معاي

كل الدروب عندى سوا

لو كان حبيبك او صديقك

او حتى قربك بس كفاى

المهم فى الامر كلو

بس انت تبقى اكيد معاى

ماتروح بعيد منى كتير

مايكون حبيبك او صديقك

زول سواي.................

لو كان حبيب انا ببقى ليك

او كان صديق انا بقى ليك

ببقالك النفس اللى طالع

ببقالك النفس اللى نازل

ببقى الدموع الفى عنيك

ببقى ابتسامتك وروعتك

2

مسحة حزن انا ببقى فيك

ببقى الفرح ليك والحزن

ببقى العذاب المشتهيهو

ومشتهيك ...............

ببقى السلام انا والكلام

حتى الحروف انا ببقى ليك

ببقى الوسادة تنوم عليها

بالعكس مابتعب انا

برتاح معاك واتهنى بيك

بس ياهواي كل المهم

انك معاي.............

مااخترت ليك انسان سواي

*****************

مرحب تعال

مرحب تعال نحكى سوا

نحكى سنين المستحيل

واحكيلك الريد القبيل

وكيف انى حبيتك انا

من انته عمرك كم سنه

وكيف الظروف جارت على

خلتنى كيف استجدى حبك

او كان صداقتك وادمنه

او اي حاجة قريبة ليك

بس المهم انته وانا

مرحب تعال

مرحب تعال نحكى سوا

انا بحكى ليك حاجات كتير

بحكيلك الحب المثير

واقطع لك النفس الطويل

واذكرك ايام زمان

يوم كنت ساهل ومستحيل

مديت معاك حبل الصبر

كملت فيك صبري الجميل

باريتو دربك بى رضاي

ومشيت معاك دربا طويل

ورهنت ليك مستقبلى

وخليت عشانك كل شى

سافرت فى عز الهجير

وهجرت اهلى عشان اجيك

واتهنى بي قربك كتير

3

مرحب تعال نحكي سوا

واحكيلك انو الدنيا دى

مابتدى كل انسان مرادو

مرات تصيب

مرات تخيب

مرات بتختار الوسط

مره ليك مرات عليك

مرات بتفرح وتبتسم

مرات بتتحايل عليك

يمكن بتساهل معاك

لكن محال يوم تتركك

تختار طريقك بى ايديك

ساعات تخليك للظروف

ساعات تقولك ماعليك

**************

مرحب تعال

مرحب تعال نحكى سوا

احكيلك الحب القبيل

اشرح لك الحب الكبير

زي مايصور ليك خيالك

مايهمنى

لو كان حبيبك او صديق

او حتى اصغر حاجه فيك

ماانت عارف ومقتنع

دى حاجة فيك

هزت مشاعرى الكامنة

وهيجتنى

طلعت مرارة كم سنة

ورجعت حزنى القديم

عكست ظروفى علي انا

وحاجة فيك

بكتنى ليك

خلتنى زي طفلا رضيع

فطموهو من بعد الرضاع

والدندنة

خلوهو جايع بالسنين

حرموهو لا حب لاحنين

وسقوهو كاسات العذاب

صبحت حياتو ممحنة

4

وحاجة فيك

قربتى كتير اليك

وبعدتنى كتير عليك

ماانت عارف ومقتنع

انا كيف بحبك ومشتهيك

حاجة فيك

خلتنى امشى معاك سنين

غطتنى بالريد والحنين

علمتنى

لما يوم الحب بيكبر

كيف بيصبحلك مهين

كيف بتتهان وانت راضي

وكيف تضيف لى عزتك

كل عذابات السنين

ومابتحس بالكبرياء

يوم تكون بالريد ضنين

مرحب تعال وتعال اقولك

دى حاجة فيك

خلتنى استسلم اليك

خلتنى اتنكر لنفسي

واتخيلك

احلى حاجة واحلى شى

غيرتنى وحيرتنى

خلتنى اشوف الدنيا

بي منظارعنيك

سلبتنى كل ارادة حره

خلتنى اتعذب واجيلك

الف مرة

مرات حبيبك ويوم صديق

ومرات اسيبك شان اجيك

حاجة فيك

شهتنى فيك

رجعتنى ووجعتنى

فقدتنى توازنى فى عز الطريق

سهدتنى وسهرتنى

وشفقتنى كتير عليك

عذبتنى وعلمتنى

كيف تكون الريدة ممكن ومستحيل

قلبت كل المواجع

والحكايات القبيل

5

قفلت كل المراسم والمواسم

وابتسامات الرحيل

ظلمت كل المدائن

والرتاين

والمصابيح المنيرة

عذبتنى وضيعتنى

وضيعت ولد القبيلة

حاجة فيك

جابتنى ليك

رغم انى عارفك مستحيلة

حاجة فيك

خلتنى اتحايل عليك

سويت صداقتى اليكى حيلة

حاجة فيك

خلتنى احيا من العدم

ظهرت لي وخلتنى اعرف

العمر من غيرك وهم

زعلتنى على سنين عمرى اللى قبلك

خلتنى اشعر بالندم

حاجة فيك

خلتنى اتمسكنت بيك

ووضعت فيك كل العشم

حاجة فيك

نستنى كل الكان زمان

نستنى احساس الالم

حاجة فيك علمتنى

لما ازعل منك انتى

كيفن اتنازل وارجع

ليكى من نص المسافة

حاجة فيك خلتنى اعرف

الريدة من بعدك خرافة

حاجة فيك

نستنى احساس الزمن

وادتنى احساس اللطافة

حاجة فيك

خلتنى امشيها المسافات القبيل

كنت بخشاها وبخافه

حاجه فيك

هذبتنى ونعمتنى

خلتنى ابقالك قيافة

6

حاجة فيك

سدت مسامات جسمى كلو

خلتنى زي طفلا صغير

شايلنو يادوب فى لفافة

**************

حاجة فيك

قربت كل المسافات البعيدة

فتحت ابواب المدائن

فتحت ابواب المساجد

دقت اجراس الكنايس

والمعابد

والحكايات السعيدة

نورت كل القلوب

الشايلة فى جواها ريدة

حطمت كل القيود

ازهرت كل البيوت

فتحت ابواب المدارس

وعلمت كل الولاد

كيف يعضو على النواجذ

وكيف يشدو على الحزام

ويبقو عشرة على المنافذ

وعلمت كل البنات

الصغيرات والعوانس

احترام كل العهود

والمواثيق النبيلة

وحاجة فيك

اعيتنى ماخلتلى حيلة

فندت كل الحجج

كسرت كل النوافذ

والمخارج

والمصابيح البديلة

والمساحات والحواجز

والمتاريس الدخيلة

حاجة فيك

اعمت العين البصيرة

وشلت اليد القصيرة

وشتت كل النفوس

التايهة بتفتش دليله

وخلفت فى قلبى حسرة

زادت احزان القبيلة

7

مرحب تعال نحكى سوا

يلا نحكى على الهوى

نحكى عن حبك وصداقتك

وعن هبوط المستوى

وعن مئل حا جات دخيلة

عن حكايات فى الهوي

عن هواجس عايشة فينا

شفناها فاقدة المحتوى

وعن حكايات لسه جاية

كيف الشباب بيها اكتوى

نحكى عن بعد المسافة

والحكايات الخرافة

نحكى عن طولك وعرضك

وارتفاعك والكثافة

وكيف كلامنا بلا معانى

لا مبادى ولاثقافة

نحكى عن اوزان بعض

وكيف تكون زايد على

وكيف تكون ناقص مسافة

نحكى عن خلق الله فيك

دون تردد او مخافة

نحكى يوم عن حاجة فيك

خلتنى ارجع ليكى تانى

بدلتنى وغيرتنى

كيف رجعت انا فى ثوانى

غيرك طبعى الزمان

خلتنى فى حبك انانى

حاجة فيك جابتنى ليك

خلتنى يوم ماربرضى فيك

واي زول منك يقرب

منو بزعل مرة تانى

حاجة فيك

جابتنى ليك

هدهدتنى ودللتنى

حاجة فيك خلتنى افقد

كل احساس بالمعانى

حاجة فيك

نستنى احلامى القبيل

وضيعت كل المعانى

8

حاجة فيك

ضيعت احساسي مره

لما افقد زول عزيز

بمشى اتلقى التهانى

حاجة فيك

جمعت كل المراحل

قفلت كل المداخل

شتتت طرق القوافل

وعقدت كل المسائل

حاجة فيك

قفلت طرق المدينة

بعثرت كل القصص

والحكايات الحزينة

حاجة فيك من البداية

ولعت فى قلبى نارحبك كتير

مرضتنى وعذبتنى

واتعبت قلبي العليل

حاجة فيك

خلتنى كيف ادمته حبك

وحاجة فيك

خاتنى كيف باريتو دربك

حاجة فيك

خلتنى فارقته الديار وسكنت جنبك

حاجة فيك

خلتنى اسال ربي ليك

يوم الحساب القاهو قربك

***************

مرحب تعال

مرحب تعال نحكى سوا

احكيلك الحب النبيل

وانت تحكى على الهوا

ايه الفرق

بين الحبيب الكان صديق

وبين الصديق الكان حبيب

وقصة هبوط المستوى

وليه نحنا قصتنا انتهت

من البداية بدون سبب

ليه وانته عارف انى ليك

وريتنى فيك كل العجب

ليه كنت تتجنب لقاي

وانت تعرف

البينا مكتوب وانكتب

9

ليه يامنايا وانته عارف

خليت حياتى جحيم وخوف

ليه من زمان ياروحي

ماطمنتنى

ووضعت لى كل النقاط

فوق الحروف

ليه وانت تعرف يامنايا ودنيتى

من دون عيونك مافى شوف

ليه يا نعيمى وكل مناي

تاركنى فى عز الهجير

علشان تشكلنى الظروف

آه ياحبيبى حرام عليك

خليتنى مااقدر اجيك

وحرمتنى

من انى اقدر اكون معاك

ومن حاجة فيك

ليه ياحبيب

حيرتنى وغيرتنى

خليتنى دايما اغير عليك

واغير كمان من حاجة فيك

حاجة فيك مسك الختام

حاجة فيك دايما تمام

ورغم انى برضو بعدت عنك

لكنى قربك ومشتهيك

ومن قلبى بغريك السلام

ولو يوم حصل

حاجة فيك شدتنى ليك

اعلم تمام

اني بس مشتاق اليك

ولى حاجة فيك

[/size]

الأحد	الإثنين	الثلاثاء	الأربعاء	الخميس	الجمعة	السبت
	1	2	3	4	5	6
7	8	9	10	11	12	13
14	15	16	17	18	19	20
21	22	23	24	25	26	27
28	29	30